چاره‌نووسی‌ 5 ده‌ستبه‌سه‌ركراوی‌ كورد 2 مانگه‌ ناڕوونه‌

5 كه‌سی‌ مه‌هابادی‌ به‌ناوه‌كانی‌ هیوا پوورمه‌ند، عه‌بدولوه‌هاب فه‌تاحی‌، قادر قه‌نده‌، فایه‌ق
رووڕاست‌و حوسێن به‌نگینپوور، كه‌ نزیك به‌ 60 رۆژه‌ له‌ لایه‌ن هێزه‌ ئه‌منییه‌تییه‌كانه‌وه‌ ده‌ستبه‌سه‌ر‌و زیندانی‌ كراون، چاره‌نووسیان هه‌روا ناڕوونه‌. ده‌وترێت ناوبراوان كه‌ به‌ تۆمه‌تی‌ هاوكاری‌ له‌گه‌ڵ‌ یه‌كێك له‌ حیزبه‌ دژبه‌ره‌كانی‌ رێژیمدا ده‌ستبه‌سه‌ر كراون، ماوه‌یه‌ك له‌ ده‌ستبه‌سه‌رگه‌ی‌ ورمێ‌‌و ماوه‌یه‌ك له‌ به‌ندیخانه‌ی‌ مه‌هاباددا بوون.
خوسره‌و كوردپوور، چالاكی‌ مافه‌كانی‌ مرۆڤـ‌و به‌ڕێوه‌به‌ری‌ ئاژانسی‌ خه‌به‌ریی‌ موكریان له‌ وتووێژ له‌گه‌ڵ‌ سرویسی‌ مافه‌كانی‌ مرۆڤی‌ ئاژانسی‌ خه‌به‌ریی‌ موكریاندا، له‌ كه‌مته‌رخه‌می‌‌و بێ‌هه‌ڵوێستی‌ هێندێك له‌ داكۆكیكارانی‌ مافه‌كانی‌ مرۆڤـ له‌ نێوخۆ‌و ده‌ره‌وه‌ی‌ وڵاتدا له‌ هه‌مبه‌ر ده‌ستبه‌سه‌ركردن، دادگایی‌‌و مه‌حكوومییه‌ته‌كانی‌ ئه‌م دواییانه‌ی‌ كورده‌كان، به‌ توندی‌ ره‌خنه‌ی‌ گرت.
ناوبراو هه‌روه‌ها، یه‌كێك له‌ هۆیه‌كانی‌ زیاتربوونی‌ ئه‌م هه‌ڵسوكه‌وتانه‌ی‌ له‌ كوردستانی‌ ئێراندا كه‌مته‌رخه‌میی‌ هێندێك له‌ داكۆكیكاران‌و ئۆرگانه‌كانی‌ داكۆكیكاری‌ مافه‌كانی‌ مرۆڤـ له‌ قه‌ڵه‌م دا.خوسره‌و كوردپوور، هه‌روه‌ها له‌ به‌شێكی‌ دیكه‌ی‌ وته‌كانیدا، وتی‌ هێدی‌ هێدی‌ ئه‌و گومانه‌ لای‌ به‌هێز ده‌بێت كه‌ له‌ روانگه‌ی‌ ئه‌و داكۆكیكارانه‌ی‌ مافه‌كانی‌ مرۆڤه‌وه‌ وه‌ك روانگه‌ی‌ حكوومه‌ت، كورده‌كان هاووڵاتیی‌ غه‌یره‌خودی‌‌و پله‌ چه‌نده‌م به‌ ئه‌ژمار دێن‌و نابێت له‌وان (كورده‌كان) ته‌نانه‌ت له‌ به‌یانیه‌یه‌كیشدا داكۆكی‌ بكرێت.