له‌ درێژه‌ی‌ مانگرتنی‌ مامۆستایاندا قوتابخانه‌كان داخران

له‌ درێژه‌ی‌ مانگرتنی‌ مامۆستایان له‌ چه‌ندین شاری‌ ئێراندا، رێكه‌وتی‌ 8ی‌ بانه‌مه‌ڕ، مامۆستایان نه‌چوونه‌ سه‌ر پۆلی‌ وانه‌وتنه‌وه‌‌و قوتابخانه‌كان داخران. به‌پێی‌ هه‌واڵی‌ ناوه‌ندی‌ خه‌به‌ریی‌ PDKI، زۆربه‌ی‌ مامۆستایانی‌ قوتابخانه‌كانی‌ مه‌ریوان‌و سه‌رجه‌م گونده‌كانی‌ ده‌وروبه‌ری‌ له‌ درێژه‌ی‌ مانگرتنی‌ سه‌رتاسه‌ریی‌ مامۆستایانی‌ ئێراندا، له‌ چوونه‌سه‌ر پۆلی‌ وانه‌وتنه‌وه‌ خۆیان بوارد.
هێزه‌كانی‌ رێژیم‌و به‌تایبه‌ت پاراستنی‌ ئیداره‌ی‌ په‌روه‌رده‌‌و فێركردن هه‌وڵیان دا به‌ هه‌ڕه‌شه‌‌و چاوترسێنكردنی‌ مامۆستایان پێش به‌و مانگرتنه‌ بگرن، به‌ڵام مامۆستایان بێ‌ سه‌رنجدان به‌ هه‌ڕه‌شه‌ی‌ هێزه‌كانی‌ رێژیم مانگرتنه‌كه‌یان درێژه‌ پێ‌ داوه‌‌و شێلگیرانه‌ پێداگری‌ له‌سه‌ر داخوازییه‌ ره‌واكانیان ده‌كه‌ن.
تا كاتی‌ گه‌یشتنی‌ ئه‌م هه‌واڵه‌ 80 له‌ سه‌دی‌ قوتابخانه‌كان له‌ ناوچه‌ی‌ مه‌ریواندا داخراون.
هه‌روه‌ها به‌پێی‌ هه‌واڵی‌ ناوه‌ندی‌ سێنفیی‌ مامۆستایان له‌ شاره‌كانی‌ ره‌شت، ئیسلامشار، كرماشان‌و میاندواودا مانگرتن كه‌ له‌ رێكه‌وتی‌ 7ی‌ بانه‌مه‌ڕه‌وه‌ ده‌ستی‌ پێكردووه‌، درێژه‌ی‌ هه‌یه‌. له‌و شارانه‌دا زۆربه‌ی‌ قوتابخانه‌كان له‌ قۆناخی‌ سه‌ره‌تایی‌یه‌وه‌ تا پێش دانشگایی‌ به‌ ته‌واوی‌ داخراوه‌.
شایانی‌ باسه‌ له‌ شاره‌كانی‌ دیكه‌ی‌ ئێراندا مامۆستایان مانیان گرتووه‌‌و به‌رده‌وام مامۆستایانی‌ شاره‌كان تێكه‌ڵ‌ به‌ مانگرتنه‌كه‌ ده‌بن.
ناوه‌ندی‌ سێنفیی‌ مامۆستایانش له‌ هه‌واڵێكی‌ دیكه‌دا رایگه‌یاند، به‌دوای‌ ده‌ستبه‌سه‌ركردنی‌ سه‌جاد خاكساری‌ له‌ كۆبوونه‌وه‌ی‌ مامۆستایانی‌ "حق التدریس"ی‌ له‌ به‌رامبه‌ر پارلمانی‌ شوورای‌ ئیسلامیدا، لقی‌ 2ی‌ دادگای‌ شۆڕش بۆ ئازادكردنی‌ ناوبراو داوای‌ بارمته‌ی‌ 50 میلیۆن تمه‌نی‌ كردووه‌.
سه‌جاد خاكساری‌ له‌ هه‌مبه‌ر ئه‌و بارمته‌یه‌دا‌و ناته‌بابوونی‌ له‌گه‌ڵ‌ ئه‌و تۆمه‌ته‌ی‌ كه‌ دراوه‌ته‌ پاڵ‌ ناوبراو، ناڕازییه‌‌و توانایی‌ دانانی‌ ئه‌و بارمته‌یه‌ی‌ نیه‌. 
ناوه‌ندی‌ سێنفیی‌ مامۆستایانی‌ تاران، سه‌جاد خاكساری‌ به‌ ته‌واوی‌ بێتاوان له‌ قه‌ڵه‌م ده‌دات‌و ده‌ستبه‌سه‌ركردنی‌ ناوبراو به‌ زوڵمی‌ چه‌ند به‌رابه‌ر له‌ به‌رامبه‌ر چالاكانی‌ سێنفیدا له‌ قه‌ڵه‌م ده‌دات.